Top Stories

nabaraj

HIKE

….तर मन त पत्थरकै जाती

जीवनको गोरेटोमा बाधा अनि अड्चनहरुमाझ

अल्झिएर पछारीनु त छँदैछ साथी

चर्किन सक्छ, चोइटिन सक्छ यो मन

….तर मन त पत्थरकै जाती।

.

प्रहार त पक्कै सहनु पर्छ, समयको नियतिको भाग्यको

चोट सहनुपर्दा चोटै चोट माथि

कुच्चिन सक्छ, टुक्रिन सक्छ यो मन

….तर मन त पत्थरकै जाती।

.

सुखै सुख त कसलाई पो लेखेको होला र

अनेकौ ब्यथा कष्ट र पिडाले पाउँदा सास्ती

डढ्न सक्छ, पग्लन सक्छ यो मन

….तर मन त पत्थरकै जाती।

.

घाउ देख्दा मल्हम हैन नुन चुक छर्ने पनि छन यहाँ

पाउँदा घात धोका अनि लान्छनाहरु नाना भाँति

गिथलिन सक्छ, चुडिन सक्छ यो मन

….तर मन त पत्थरकै जाती।

.

अनेकौं बोझ समस्या र दिक्दारीका खातका खात

पश्चातापको भार त कति कति

भाँचिन सक्छ, लाछिन सक्छ यो मन

….तर मन त पत्थरकै जाती।